|
Antia Ulandes ta gana Nicaragua 2 -0 i awor ta bai prepara pa enfrenta Haiti
Djarason 27 di Mart 2008
NAVU TA FELISITA PUEBLO KU E VIKTORIA DI NOS SELEKSHON NASHONAL DI FUTBOL I TA GRADISI PA E SOSTEN MASAL
Willemstad- Djarason 26 di mart, Stadion Ergilio Hato, kolma ku un gran públiko, tur apoyando nos selekshon nashonal di futbòl ku a respondé i duna nos un viktoria konvinsente riba Nicaragua, ta bai den istoria komo e fecha kaminda nos lo rekordá ku nos a dal e promé paso rumbo pa mundial 2010. Nederlands Antilliaanse Voetbal Unie (NAVU) ta felisitá pueblo ku e triunfo di nos selekshon nashonal di futbòl. Stadion Ergilio Hato tabata esenario pa un momentu den istoria yena ku emoshon, orguyo i union. Danki na e patrosinadònan mayó esta Fundashon Bon Intenshon, Ennia i Maduro & Curiel’s Bank, e sosten masal di nos pueblo i e prestashon sublime di nos selekshon nashonal di futbòl ku awe nos por mira bek riba un gran momentu. NAVU ke felisitá i gradisí un i tur pa e sosten i aporte.
Ku e triunfo riba Nicaragua, nos selekshon su bista awor ta fiha riba Haiti. Miéntras ku ainda nos ta den euforia di e triunfo di djarason último preparashonnan ta kuminsá pa por ta kla ora nos mester subi tereno kontra di e onsena di Haiti. E ekipo di Haiti no ta fásil pero no imposibel. Nos selekshon nashonal, bou di guia di e direktor tékniko sr. Leen Looyen, lo prepará su mes debidamente pa por kumpli ku e kompromiso ku nos selekshon tin ku nos komunidat. E promé partido kontra Haiti lo tuma lugá medio yüni próksimo na Haiti miéntras ku e partido di regreso, na Kòrsou den Stadion Ergilio Hato, lo tuma lugá un siman despues. NAVU ke pidi un i tur pa sigui sostené nos selekshon nashonal engrande afin ku huntu nos por surpasá Haiti i pone nos mas serka ainda di Mundial 2010 na Sur Afrika. NAVU lo sigui informá komunidat di e desaroyonan di nos selekshon i nos estreanan ku ta forma parti di nos selekshon.
Un biaha mas NAVU ke mustra su apresio pa e konfiansa duna dor di e patrosinadònan mayó esta Fundashon Bon Intenshon, Ennia i Maduro & Curiel’s Bank pa konfiansa demonstrá. E aporte di e patrosinadònan mayó sigur bal keda suprayá. NAVU ke gradisí tambe e públiko ku a asistí den Sentro Deportivo Kòrsou pa nan komportashon ehemplar. Por último NAVU ke gradisí tambe prensa pa e forma tremendo ku prensa a kubri i duna sosten na nos selekshon nashonal. NAVU ke felisitá pueblo i un ta konfia ku e por keda konta ku e sosten masal duna na nos selekshon nashonal di futbòl.
Ban sigui demonstrá: Esfuerso, Union, Sosten i Forsa
|
|
|
|
|
|
|
|
|
nos selekshon nashonal vs Nicaragua dia 26 proksimo |
|
